Presentación de actividades

 

CluBiblioneme

GRUPO “O MONTE DOS LIBROS”

(Alumnado 1º, 2º, 3º, 4º ESO e FPB)

Presentación actividades

Un curso máis queremos continuar coa nosa actividade do Club de Lectura, CluBiblioneme. O noso obxectivo é incentivar a formación lectora.

Realizaranse as actividades do club seguindo as medidas establecidas polo protocolo Covid do centro e desenvolveranse os luns de 15:00 a 16:00 horas.

Se queres ser membro do noso club, debes anotarte, antes do 7 de outubro, na biblioteca do centro.

Anímate!!!

REFLEXIÓNS LECTORAS

 Grupo “O monte dos libros”

Coñecer outras literaturas e, con iso, ampliar as xeografías lectoras dos membros do Grupo “O monte dos libros” foi a proposta de Clubiblioneme para este trimestre.

Os relatos de Kipling (Contos de así foi) foi a lectura escollida por Silvia e Yaiza, na que destacaron o humor co que se narraban as peripecias que vivían os animais.

Melisa, Iria e Uma  coincidiron coa obra A rapaza de tinta e estrellas. Novela moi entretida, chea de misterios, aventuras e moita imaxinación.

“Cada un de nós leva o mapa da súa vida na pel, no xeito que camiña, mesmo no xeito en que medra.”

                                                                      Millwood, K.- A rapaza de tinta e estrellas                                                                             

Kevin, Alba, Sara e Nerea sinalaron a valentía do protagonista da novela que escolleron, Un puñado de estrellas. Durante tres anos, o protagonista escribe un diario no que reflicte o seu paso da infancia a idade adulta nunha realidade hostil, marcada polas desigualdades.

O París de principios do século XX enmarca a obra de Irène Némirovsky, O baile, que nos descubre a unha adolescente vingativa. A actitude dos país, o egoísmo de Antoinette e o retrato da sociedade da época son os elementos que máis interesaron a Elisa, Eva, Ivana, Laura, Natalie e Jesús.

Despedimos un curso de retos, confinamento e máscaras no que precisamos, máis que nunca, comunicarnos e compartir. A través das actividades do Clubiblioneme quixemos que así fose. Obxectivo cumprido. Grazas a tod@s @s que nos apoiaron neste propósito e, principalmente,  aos membros do Club.

 Voltaremos o vindeiro curso, con forzas renovadas e o mesmo compromiso.

Bo Verán e Boas Lecturas!

“Necesitamos desesperadamente que nos conten historias. Tanto como comer, porque nos axudan a organizar a realidade e iluminan o caos das nosas vidas.”

 

Paul Auster

8ª xuntanza Grupo “Merlín e familia”

Merlín e familia de Álvaro Cunqueiro foi a obra elixida para rematar as actividades deste grupo, condicionadas por esta larga pandemia que estamos padecendo.

Con esta novela, que da nome a este grupo, publicada en 1955, Cunqueiro comezou a súa obra narrativa. Estamos ante a historia dun Merlín vello, refuxiado nas terras de Miranda, que nos chega a través do relato do paxe Felipe de Amancia.

Na xuntanza virtual do 14 de xuño, descubrimos o dominio deste autor da historia medieval, da materia de Bretaña e do mundo celta.

A unión de historias imaxinadas con relatos absurdos e as referencias artúricas son os aspectos da obra que máis sorprenderon a Gema e a Mercedes.

Sen dúbida a unión da maxia e da fantasía coa realidade galega diríxenos a un realismo máxico galego. Así o comentaron Pilar, Celeste e Loli.

Culta, imaxinativa e moi divertida foron os adxectivos cos que calificaron esta novela Marga, Chelo e Vanesa.

“Verdade ou mentira, aqués anos da vida ou da imaxinación foron enchendo cos seus fíos o fuso do meu esprito i agora podo tecer o pano distas historias, novelo a novelo.”

                                                                                      Merlín é Familia

 Rematamos as reunións deste curso, condicionado pola pandemia. Esperamos que o vindeiro  podamos retomar as reunións presenciais.

O equipo de CluBiblioneme quere agradecer a fidelidade mostrada por todos os membros deste grupo que, virtualmente, seguiron ampliando as súas xeografías lectoras e crecendo como grupo e como lector@s.

Ata o próximo curso.

Bo verán e boas lecturas!

DÍA DAS LETRAS GALEGAS 2021

 Descubrindo a Xela Arias

“Que nunca, nunca xamais, me diga alguén que non entende de poesía. A poesía non se entende, síntese ou non se sinte, faise ou non se fai".

A Real Academia Galega dedícalle o Día das Letras Galegas 2021 a Xela Arias, unha das voces máis destacadas da poesía galega contemporánea.

Nerea Antelo Benítez, Alba Eirín Castillo, Uma Eirís Ferreiro, Iria Muíño Puente, Kevin Pallas Cebral e Melisa Pose Vázquez, alumn@s de 1º ESO e membros do grupo “O monte dos libros” do CluBiblioneme, colaboraron na gravación do podcast da Biblioteca en RadioNeme.

Podes entrar no seguinte enlace para escoitalo:

http://www.edu.xunta.gal/centros/iesmonteneme/system/files/Audio_Xela.mp3

Biblioneme convídate, a través da lecturas dos seus libros, a seguir descubrindo a esta autora rebelde que derrubou convencións para construir a súa realidade, a súa independencia.

“Un libro pide demasiado. Pero hai que rebotarse contra iso. Rebotarse contra a concepción do libro coma un cadáver morto nun anaquel.”

                                                                            Xela Arias

De certo, a vida ía en serio.

Por iso morrer non conta

números.

 

Eras moza,

cómplice nunha derrota que non

sumabas. Feliz por terte insomne

por inmortal.

 

Xa temos cadáveres amigos

e coñecidos,

sabemos da morte o legado inútil.

 

Pero ¡que ridículo!, ¿non?,

abrazar o feito feliz de xa medrar

-camiñar ás aforas-

en tempos asépticamente tan

alienados.                                 

Intempériome (2003)

PREMIOS IV CERTAME CONTOS DE PRIMAVERA

 Na Semana das Letras, a Biblioteca Rego da Balsa de Carballo acolleu o sábado, 15 de maio, a entrega dos premios correspondentes á IV Edición do Certame Contos de Primavera, concurso convocado por Radio Voz e La Voz de Galicia, co patrocinio de Industrias Calvo.

Jesús M. Rey Gómez, alumno de 4º ESO A do IES Monte Neme, gañou o segundo premio deste certame co relato “Wolframio no fondo do Atlántico”.

O Alcalde de Carballo, Evencio Ferrero,  entregou o premio a Jesús M. Rey

Jesús, que xa obtivo o cuarto galardón deste concurso na convocatoria de 2018, forma parte desa xuventude que cre e constrúe na nosa lingua.

Noraboa a tod@s @s participantes!

Participantes no acto celebrado na Biblioteca Rego da Balsa (Carballo)

Enlaces de interese:

Ø  Textos premiados publicados en La Voz de Galicia:

https://www.lavozdegalicia.es/default/2021/05/14/00171621027083684929873/Fichero/ContosPrimavera2021.pdf

Ø  Noticia La Voz de Galicia:

https://www.lavozdegalicia.es/noticia/carballo/carballo/2021/05/16/span-langglseredes-os-novos-xenios-da-literatura-galegaspan/0003_202105C16C7992.htm

7ª xuntanza Grupo “Merlín e familia”

 O 12 de maio, no centenario da súa morte, o Grupo “Merlín e familia” homenaxeou á figura de Emilia Pardo Bazán coa lectura de El encaje roto. Antología de cuentos de violencia contra las mujeres.

Reivindicamos o feminismo desta autora que non conseguiu entrar na RAE, mais logrou ser a primeira muller en presidir a sección literaria do Ateneo de Madrid e obter unha cátedra de literaturas neolatinas na Universidad Central desta cidade.

Todos os relatos desta antoloxía parecéronnos fáciles de ler, todos protagonizados por mulleres e moi interesantes. Destacamos El indulto, El encaje roto, Sí Señor, e El mechón blanco.

Todos eles reflicten , como ven sinala Celeste, a violencia que soportaban as mulleres da súa época e as súas loitas. Historias breves, pero intensas.

Ademais, salientamos a marabillosa forma de narrar desta escritora universal.

“No se hubiesen convencido jamás. Lo natural y lo vulgar es lo que no se admite. Preferí dejar creer que había razones de esas que llaman serias …”

                                                                                                  El encaje roto

Na vindeira xuntanza, o 14 de xuño, despediremos o curso cunha obra de referencia para este grupo, Merlín e familia de Álvaro Cunqueiro.

6ª xuntanza Grupo “Merlín e familia”

O pasado 7 de abril o noso grupo “Merlín e familia” reuniuse para comentar a novela Infamia.

“Con este libro quixen escribir sobre unha desaparición e incidir na dor dos país”

                                                                                             Ledicia Costas

Nesta obra, a primeira de Ledicia Costas para adultos, atopámosnos cunha novela coral, un thriller psicolóxico no que hai moito sufrimento, moita escuridade e nada é o que parece.

Os comentarios, por parte dos membros do grupo, foron moi favorables e interesantes.

Para Celeste estamos ante unha obra entretida, chea de vidas escuras e traumáticas. Espera, ansiosa, unha segunda parte.

A Marga despertoulle emocións e enfados pola realidade que tiveron que vivir a maioría dos personaxes, dos que destaca a Emma.

Loli, Sonia, Gema e Chelo coinciden en que se trata dunha novela negra, policíaca e moi entretida, cun final aberto, na que se describe moi ben o perfil psicolóxico dos personaxes, a súas angustias e remordimentos.

A Vanesa gustoulle moito como escribe Ledicia Costas ainda que considera que en esta obra mestura demasiados temas.

En definitiva, unha lectura moi ben valorada.

O 12 de maio reunirémonos, on line, para homenaxear a Emilia Pardo Bazán coa lectura de El encaje roto. Antología de cuentos de violencia contra las mujeres.